ماينفعش .. + تحديث مهم ..

تحديث :

علشان الناس إللي فهمتني غلط .... وذلك في وقت الفهم الخاطيء أصبح موضه ..

أنا لست من أنصار لا الرئيس يقعد ولا الرئيس يمشي ..

أنا من أنصار أن يبقى في تعديل للمواد .76 77. 88 من الدستور .... والغاء الطواريء ..

وانا مقتنعه إن رحيل مبارك مش هيضمن ده بنسبه 100 % ..

وزي ما قلت على تويتر .... حد يضمنلنا كده وسواء يقعد يمشي مش ده الأساس ..

عارفه ان في شهداء كتير ..

بس هحس إن دمهم مارحش هدر لو بعد كام شهر لقيت انتخابات نزيهه ورحت انتخب ببطاقه الرقم القومي تحت اشراف القضاء ..

لكن عمري ما هحس إنهم خدوا حقهم ومبارك مطرود بره وأنا قاعده بتفرج على فيديوهات تزوير الانتخابات الرئاسيه بعد كام شهر ..

بس خلاص

-----------------------------------------------------------------------------------------------

مش عايزه ناس تموت تاني ..

وعارفه إننا في أزمه ثقه مع النظام ..

بس مفيش حل هيحصل في يوم وليله ..... وما أعتقدش إن مبارك هيرجع لا هو ولا إبنه للحكم بعد كده تاني ..

النظام مش بالغباء انه يبعت بلطجيه يفضوا المظاهرات ..... لإن كان في تعاطف مع خطاب الرئيس الأخير ..

أنا أشك في غباء قيادات الحزب الوطني من رجال الأعمال .... وإنهم بعتوا الهتيفه بتوعهم وكالعاده دول بلطجيه ومايعرفوش غير الضرب ومن هنا حصل الإشتباك ..

أنا شايفه إنه مجرد إفشال سيناريو التوريث وعدم ترشح الرئيس لفتره تانيه ده إنجاز للمظاهرات ..

لو مشي الريس بكره هتفرق إيه ؟!!

تعديلات الدستور كانت هتتم مع نفس الأشخاص إللي بتتم معاهم دلوقتي ....... المعارضه وبعض بقايا النظام ..

مفيش ثوره حصل بعدها جنه الله في ارضه ..... والمكاسب مش دايما بتكون كبيره ..

نفسي حد يفهمني رايحيين لفين ؟!! لإن إللي بيحصل ده ماينفعش ..